တၢ်အိၣ်ဖှိၣ်အတၢ်စံၣ်စိၤတဲစိၤဒီးတၢ်အိၣ်ဖှိၣ်အတၢ်ဟဲကဲထီၣ်အဂ့ၢ်အကျိၤ

ပတၢ်အိၣ်ဖှိၣ်အတၢ်ဟဲကဲထီၣ်အဂ့ၢ်အကျိၤဖုၣ်ကိး,ယအဲၣ်ဒီးတဲက့ၤလၢအဂ့ၢ်အကျိၤန့ၣ်လီၤ.တဘျီန့ၣ်ကစၢ်ယွၤဟ့ၣ်ယၤလၢတၢ်ထံၣ်တၢ်လီၣ်ဖျါလၢယတၢ်မံမီၢ်အပူၤန့ၣ်လီၤ.တဘျီန့ၣ်,ယပိာ်လိာ်သးခံဒီးယ၀ဲၢ်လၢအတဃံးဒီးယၤတဂၤန့ၣ်,ပလဲၤတၢ်လၢပှၢ်မုၢ်ကနၢအပူၤ,လၢအမ့ၢ်၀ဲဒၣ်မဲးမုၢ်ခိၣ်ဖးလဲၢ်တဘ့ၣ်အပူၤန့ၣ်လီၤ.ဖဲယၤဒီးယ၀ဲၢ်ပလဲၤတၢ်အဆၢကတီၢ်န့ၣ်,ယနၢ်ဟူတၢ်ကလုၢ်သီၣ်၀ဲဒၣ်လၢယသးကံၢ်ပူၤလၢယကဘၣ်မၤထီၣ်၀ဲဒၣ်တၢ်လုၢ်တခါလၢကစၢ်ယွၤအဂီၢ်,ဖဲန့ၣ် ယသးပူၤထိၣ်ဟူးထိၣ်ဂဲၤဒၣ်ယၤလၢယကဘၣ်မၤထီၣ်တၢ်လုၢ်န့ၣ်လီၤ.ဖဲန့ၣ်ယတဲဘၣ်ယ၀ဲၢ်လၢတၢ်ဂ့ၢ်တဖၣ်အံၤ, ဒီးဖဲန့ၣ်ယ၀ဲၢ်တဲယၤကစၢ်ယွၤမ့ၢ်ကတိၤတၢ်ဒီးနၤဒ်န့ၢ်န့ၣ်မၤတခီ,ဖဲန့ၣ်ယစးထီၣ်ဃု၀ဲဒၣ်လၢၢ်တဖျၢၣ်ဘၣ်တဖျၢၣ်လၢမဲးမုၢ်ခိၣ်ဖဲန့ၣ်,ယပာ်ဖှိၣ်က့ၤတပူၤဃီလၢတၢ်လီၢ်တတီၤဃီဒ်တၢ်လုၢ်လီၢ်တတီၤအသိးန့ၣ်လီၤ.ဖဲန့ၣ်၀ံၤဒီးယတဲဘၣ်ယ၀ဲၢ်တဘၣ်အိၣ်ဘူးဒီးယၤဖဲအံၤဘၣ်,အိၣ်စီၤစုၤယံၤဒီးယၤဖဲန့ၣ်ယ၀ဲၢ်ဂုၤက့ၤအလီၢ်ခ့လၢယံၤ၀ဲဒၣ်ဒီးယၤန့ၣ်လီၤ.ဖဲန့ၣ်ယချံးလီၤ ယခီၣ်ဒီးယကျာ်လီၤယမဲာ်လၢဟီၣ်ခိၣ်လိၤဖဲန့ၣ်ဒီးယစးထီၣ်ဘါထုကဖၣ်တၢ်,ဖဲယဘါထုကဖၣ်တၢ်ယံာ်၀ဲဒၣ်တတီၤဖိန့ၣ်,ယထံၣ်ဘၣ်၀ဲဒၣ် (မ့ၣ်အူ) လၢမူခိၣ်ဟဲလီၤ၀ဲဒၣ်လၢတၢ်လုၢ်၀ဲန့ၣ်အဖီခိၣ်,တကတီၢ်ဃီဖဲန့ၣ်ယနၢ်ဟူတၢ်ကလုၢ်သီၣ်ထီၣ်၀ဲဒၣ်လၢမူခိၣ် (၃) ဘျီ,တဲ၀ဲဒၣ် (ယသူနၤ,ယသူနၤ,ဂဲၤဆ၊ထၢၣ်) န့ၣ်လီၤ.ဖဲ ယနၢ်ဟူတၢ်ကလုၢ်၀ဲန့ၣ်၀ံၤန့ၣ်ယဖုသံနီၣ်ထီၣ်ဘၣ်ယသး, ဒီးဖဲန့ၣ်ယဘါထုကဖၣ်ကစၢ်ယွၤ,ယသံကွၢ်၀ဲဒၣ်ကစၢ်ယွၤလၢတၢ်ဂ့ၢ်၀ဲအံၤအခီပညီမ့ၢ်ဒ်လဲၣ်န့ၣ်လီၤ.
စးထီၣ်ဖဲန့ၣ်လၢတၢ်ဆၢကတီၢ်စှၤလါအပူၤန့ၣ်,တၢ်လၢအထိၣ်ဟူးထိၣ်ဂဲၤထီၣ်ယသးအဒိၣ်ကတၢၢ်န့ၣ်မ့ၢ်တၢ်အိၣ်ဖှိၣ်န့ၣ်လီၤ.တၢ်ထံၣ်,တၢ်လီၣ်ဖျါလၢကစၢ်ယွၤ လီၣ်ဖျါထီၣ်န့ၣ်ယၤအံၤ,လီၤဂာ်အိၣ်ပှဲၤလုၢ်ကွံာ်လၢယသးကံၢ်ပူၤ,မ့ၢ်တၢ်ထိၣ်ဟူးထိၣ်ဂဲၤယသးလၢသးဒီဖျၢၣ်ညါ,ယအိၣ်ဒ်န့ၣ်ယအိၣ်တမုာ်ဘၣ်မ့ၢ်ယအဲၣ်ဒီးမၤ တၢ်တမံၤမံၤလၢကစၢ်ယွၤအဂီၢ်န့ၣ်လီၤ.

စးထီၣ်မုၢ်နံၤ၀ဲန့ၣ်ယစးထီၣ်ကတိၤဖျါထီၣ်တၢ်ဂ့ၢ်၀ဲအံၤဆူ သရၣ်မုၣ် ခုၣ်ထီ လၢတၢ်လီၣ်ဖျါ၀ဲအံၤန့ၣ်လီၤ.၀ံၤအလီၢ်ခံယတဲဘၣ်ကဒီး သရၣ်မုၣ် သလ့ၤဖီကၠံၤလၢတၢ်လီၣ်ဖျါ,တၢ်ထံၣ်၀ဲစ့ၢ်ကီးန့ၣ်လီၤ.၀ံၤအလီၢ်ခံတယံာ်ဘၣ်ယစးထီၣ်ကတိၤဘၣ်ဃးဒီးခရံာ်အတၢ်အိၣ်ဖှိၣ်တဘျီကဒီးဆူ သရၣ်မုၣ် ခုၣ်ထီ အဆိကတၢၢ်လၢအဘၣ်ဃးဒီးခရံာ်တၢ်အိၣ်ဖှိၣ်ဖဲ June 03/20218 လၢဟါခီ ၆း၀၀ န့ၣ်လီၤ.ဖဲန့ၣ်ယကတိၤတၢ်ဂ့ၢ်အါမးလၢအဘၣ်ဃးဒီးခရံာ်တၢ်အိၣ်ဖှိၣ်န့ၣ်လီၤ.လီၢ်ခံတအါသီဘၣ်ယစးထီၣ်ကတိၤကဒီးတၢ်ဒီး သရၣ်မုၣ် သလ့ၤဖီကၠံၤ ဖဲ June 13/2018 လၢဂီၤခီ ၁၁း၄၅ န့ၣ်လီၤ.ဖဲန့ၣ်ယတဲဘၣ်အီၤတၢ်ဂ့ၢ်တၢ်ကျိၤအါမးလၢအအိၣ်လၢယသးပူၤလၢတၢ်လၢအထိၣ်ဟူးထိၣ်ဂဲၤယသးသ့ၣ်တဖၣ်န့ၣ်လီၤ. ဒီးဖဲန့ၣ်ပ၀ဲဒၣ် (၃) ဂၤလၢာ်ပသးလီၤပလိာ်သးဒီးပအိၣ်စ့ၢ်ကီးဒီးတၢ်ပာ်သးတမံၤ ဃီ,တၢ်ဆီၣ်ထွဲလိာ်ပသးတဂၤဒီးတဂၤမ့ၢ်ဂ့ၤ,တၢ်ဟ့ၣ်ဂံၢ်ဟ့ၣ်ဘါလိာ်ပသးတဂၤဒီးတဂၤမ့ၢ်ဂ့ၤ,လၢအဘၣ်ဃးဒီးတၢ်သူၣ်ထီၣ်၀ဲဒၣ်တၢ်အိၣ်ဖှိၣ်လၢပကမၤသ ကိး ကစၢ်ယွၤအတၢ်ဖံးတၢ်မၤဒ်ပမၤအီၤသ့အသိးန့ၣ်လီၤ.

စးထီၣ်ဖဲန့ၣ်ပစးထီၣ်ဘါထုကဖၣ်သကိးလၢတၢ်ဂ့ၢ်တၢ်ကျိၤသ့ၣ်တဖၣ်အံၤ,တုၤဃီၤ၀ဲဒၣ်ဖဲ June 19/2018 ဟါခီ ၄း၃၀ န့ၣ်ယၤဒီး သရၣ်မုၣ် ခုၣ်ထီ ပမၤသ ကိးတၢ်ထံၣ်လိာ်အိၣ်သကိးပသးဒီးပလဲၤထံၣ်လိာ်ပသးဒီး သရၣ်မုၣ် ၀ါ၀ါ ဆူပဒိၣ်အရူန့ၣ်လီၤ.ပတၢ်လဲၤထံၣ်လိာ်အိၣ်သကိးပသးအံၤမ့ၢ်ဒ်သိးဒီးအ၀ဲမၤစၢၤပှၤကသ့လၢကျဲတဘိဘိလၢအဘၣ်ဃးဒီးပတၢ်ရဲၣ်တၢ်ကျဲၤဘၣ်ဃးဒီးတၢ်အိၣ်ဖှိၣ်အံၤ,တဘျီဃီအ၀ဲကမၤစၢၤပှၤလၢကဃုစၢၤပှၤတၢ်ဘူၣ်တၢ်ဘါအလီၢ်စ့ၢ်ကီးန့ၣ်လီၤ.အ၀ဲအံၤမ့ၢ်ပတၢ်ထံၣ်လိာ်အိၣ်သကိးပသးအဆိကတၢၢ်တဘျီဖဲ Catholic Immigration Centre န့ၣ်လီၤ.

ဖဲန့ၣ်တယံာ်ဘၣ်ဒီးပစးထီၣ်မၤတၢ်ထံၣ်လိာ်အိၣ်သကိးလိာ်ပသးအိၣ်ဖှိၣ်သကိး,ဘၣ်ဃးဒီးတၢ်အိၣ်ဖှိၣ်အတၢ်ဖံးတၢ်မၤ,တဘျီဃီပစးထီၣ်ကိးန့ၢ်ပတၢ်အိၣ်ဖှိၣ်အမံၤလၢ DREAM MINISTRIES တၢ်သးခုကစီၣ်အတၢ်မံမီၣ်တၢ်မၤလီၢ်န့ၣ်လီၤ. ပကိးကဒီးအမံၤအသီတဖျၢၣ်လၢပှၤအါဂၤကနၢ်ပၢၢ်၀ဲဒၣ်အဂီၢ်န့ၣ်မ့ၢ်၀ဲဒၣ်
“Karen Christian Family Fellowship Church” န့ၣ်လီၤ. ၀ံၤအလီၢ်ခံပစးထီၣ်ကတိၤကဒီးတၢ်အိၣ်ဖှိၣ်အတၢ်ဖံးတၢ်မၤ,အတၢ်ကွၢ်စိ,အတၢ်ဟူးတၢ်ဂဲၤသ့ၣ်တဖၣ်,ဒီးပဃုလံာ်စီဆှံအဆၢတၢ်ဘၣ်ထွဲဒ်အမ့ၢ်၀ဲဒၣ် (မီထိၣ်) အသိးပထံၣ်ဘၣ်ဖဲ လံာ်စီဆှံ ၂ တံၤမသ့း ၄း၅ "တၢ်အခ့အပှၤတၢ်မၤန့ၣ်,မၤအီၤလၢလၢပှဲၤပှဲၤတ က့ၢ်" ၀ံၤအလီၢ်ခံတယံာ်ဘၣ်ဒီးပစးထီၣ် August 26/2018 ဖဲန့ၣ်ပစးထီၣ်ဃုထၢထီၣ်က့ၤတၢ်အိၣ်ဖှိၣ်ခိၣ်နၢ်စှၤဂၤလၢကဖီၣ်ဂၢၢ်၀ဲဒၣ်ပတၢ်ဖံးတၢ်မၤန့ၣ်လီၤ. ဒီးပစးထီၣ်ဘူၣ်သကိးဘါသကိးက့ၤ ယွၤလၢဟံၣ်တဖျၢၣ်ဘၣ်တဖျၢၣ်စးထီၣ်လၢ ပတၢ်အိၣ်ဖှိၣ်သရၣ် လါစ့ အဟံၣ်န့ၣ်လီၤ. လီၢ်ခံတနွံပဘါသကိးကဒီးယွၤ လၢ သရၣ်မုၣ်သလ့ၤဖီကၠံၤ အဟံၣ်ပူၤန့ၣလီၤ. ၀ံၤလီၢ်တနွံ သရၣ်မုၣ် ခုၣ်ထီ အဟံၣ်, လီၢ်ခံတနွံ ကၠီကါဒဲနါပါ အဟံၣ်, လီၢ်ခံ သးပှၢ် ကျိၣ်စ့ အဟံၣ်, ၀ံၤအလီၢ် ခံ ပက့ၤကဒါက့ၤဆူ တၢ်အိၣ်ဖှိၣ်သရၣ်လါစ့ အဟံၣ်န့ၣ်လီၤ. ပလဲၤသကိးတ့ၢ်ဒ်အံၤတနွံဘၣ်တနွံန့ၣ်လီၤ.

ပလဲၤတ့ၢ်လၢတၢ်ဘူၣ်တၢ်ဘါအတၢ်ရဲၣ်တၢ်ကျဲၤဒ်အံၤတုၤဃီ၀ဲဒၣ်လၢ October 14/ 2018 ပစးထီၣ်ဃုထၢထီၣ်က့ၤတၢ်အိၣ်ဖှိၣ်ခိၣ်နၢ်လီၤတံၢ်လီၤဆဲးလၢကဟံးမူဒါလၢတၢ်အိၣ်ဖှိၣ်အတၢ်ဖံးတၢ်မၤန့ၣ်လီၤ.တၢ်အိၣ်ဖှိၣ်ခိၣ်နၢ်လၢဘၣ်တၢ်ဃုထၢထီၣ်ဘၣ်တၢ်ပာ်ဂၢၢ်ပာ်ကျၢၤက့ၤအီၤတဖၣ်အံၤန့ၣ်,အ၀ဲသ့ၣ်တဖၣ်မ့ၢ်က့ၤ၀ဲဒၣ် DREAM MINISTRIES  “Karen Christian Family Fellowship Church” ကမံးတံာ်န့ၣ်လီၤ. ပၢဆှၢတၢ်ကမံးးတံာ်တဖုအံၤဘၣ်တၢ်ပာ်ဂၢၢ်ပာ်ကျၢၤအီၤဖဲလါ October 3/2018 ဟါခီ ၅း၀၀ − ၇း၀၀ တၢ်အိၣ်ဖှိၣ်အဆၢကတီၢ်န့ၣ်လီၤ. တၢ်သးခုကစီၣ်အတၢ်ဖံးတၢ်မၤအံၤပစးထီၣ်အီၤ, ဒီးပစးထီၣ်ကတိၤက့ၤတၢ်အိၣ်အ LOGO ၀ံၤ, ပစးထီၣ်ပာ်လီၤက့ၤတၢ်အိၣ်ဖှိၣ်အတၢ်ဘျၢတၢ်သိၣ်တၢ်သီသ့ၣ်တဖၣ်ဒ်တၢ်အိၣ်တဖုအသိးဖဲ October 18/2018 န့ၣ်လီၤ.
၀ံၤအလီၢ်ခံတုၤဃီၤ၀ဲဒၣ်လၢတၢ်ကဒိးပာ်စုက့ၤပတၢ်အိၣ်ဖှိၣ် သရၣ် လါစ့ လၢကကဲထီၣ်က့ၤသရၣ်ဒိၣ်လၢတၢ်အိၣ်အပူၤဖဲလါ November 11/2018 အပူၤ, ပနာ်နီၢ်နီၢ်လၢအ၀ဲအံၤမ့ၢ်၀ဲဒၣ်ကစၢ်ယွၤအတၢ်ရဲၣ်တၢ်ကျဲၤသ့ၣ်တဖၣ်ခဲလၢာ်လၢပတၢ်အိၣ်ဖှိၣ်အတၢ်ဖံးတၢ်မၤအပူၤန့ၣ်လီၤ.

စးထီၣ်ဖဲန့ၣ်အလီၢ်ခံပစးထီၣ်ဃုက့ၤတၢ်ဘူၣ်တၢ်ဘါအလီၢ်လၢကလီၤတံၢ်လီၤဆဲးလၢပတၢ်ဘါသကိးယွၤအလီၢ်, လၢအမ့ၢ်၀ဲဒၣ်တၢ်ဘါယွၤသရိာ်န့ၣ်လီၤ.ဖဲန့ၣ်ယစးထီၣ်ကွဲးလံာ်ဆူတၢ်အိၣ် (၁၃) ဖုလၢပအိၣ်၀့ၢ်၀ဲအံၤအပူၤ, ပန့ၢ်ဘၣ်က့ၤတၢ်စံးဆၢ အခီၣ်ထံးတဖျၢၣ် တၢ်လီၢ်တဘၣ်လီၢ်ဘၣ်စးလၢပတၢ်လိၣ်ဘၣ်အဃိပတငါအီၤလၢၤဘၣ်, တယံာ်ဘၣ်ဒီးပန့ၢ်ကဒီးတၢ်စံးဆၢလၢကၠိဘါယွၤအသီတဖျၢၣ်လၢမ့ၢ်၀ဲဒၣ် St. Basil’s Church အ၀ဲအံၤမ့ၢ်၀ဲဒၣ် ပဒီပုၢ်၀ဲၢ် "ခဲၣ်သလံး" အ တၢ်အိၣ်ဖှိၣ်, ဖဲန့ၣ်ပထံၣ်ဘၣ်လၢတၢ်လီၢ်တၢ်ကျဲခဲလၢာ်ပဘၣ်သူၣ်ဘၣ်သးဒီးပအၢၣ်လီၤတူၢ်လိာ်လၢပစးထီၣ်ငါ၀ဲဒၣ်ကၠိဘါယွၤတဖျၢၣ်အံၤ, ဒီးဖဲန့ၣ်ပအိၣ်၀ဲဒၣ်ဒီးတၢ်ပာ်စီဆှံက့ၤပတၢ်ဘူၣ်တၢ်ဘါလီၢ်ဖဲ November 18/2018 ဟါခီ ၁း၀၀ အပူၤ, ပဘါသကိးယွၤဖဲန့ၣ်အိၣ်၀ဲဒၣ် ၂ နံၣ်ဘျဲၣ်န့ၣ်လီၤ.

ပဘါသကိးယွၤဖဲတၢ်ဘါယွၤသရိာ်၀ဲအံၤ (၂) နံၣ်၀ံၤအလီၢ်ခံ, ပန့ၢ်ဘၣ်ကဒီးတၢ်ခွဲးတၢ်ယာ်အဂ့ၤလၢကစၢ်ယွၤကတီၤန့ၢ်ပှၤ,ပန့ၢ်ဘၣ်ကဒီးတၢ်ဘါယွၤသရိာ်လၢ အသီတဖျၢၣ် ဖဲ McPhail Memorial Baptist Church အတၢ်အိၣ်ဖှိၣ်သရၣ်ဒိၣ်တူၢ်လိာ်ပှၤလၢပကဘါထီၣ်ဘၣ်ပကစၢ်ယွၤန့ၣ်လီၤ.ပန့ၢ်ဘၣ်တၢ်လီၢ်ဖဲအံၤဖဲ 2021 အနံၣ်၀ဲန့ၣ်အပူၤန့ၣ်လီၤ.ပသ့ၣ်ညါလၢကစၢ်ယွၤအဘျုးအဖှိၣ်ဘၣ်ပှၤဒိၣ်မးလၢပတၢ်ဖံးသကိးမၤသကိးအပူၤန့ၣ်လီၤ.ပတၢ်အိၣ်အတၢ်မူတၢ်ဂဲၤ,အ တၢ်လဲၤတရံးအသးခါဆူညါသ့ၣ်တဖၣ်, ပလိၣ်ဘၣ်လၢတၢ်အိၣ်ဖှိၣ်ခိၣ်နၢ်သ့ၣ်တဖၣ်,ပှၤကိးဂၤဒဲးလၢသုကသ့ၣ်နီၣ်ဘၣ်ပတၢ်ဖံးတၢ်မၤသ့ၣ်တဖၣ်လၢတၢ်ထုကဖၣ်အါအါ, လၢတၢ်မူထီၣ်ဂဲၤထီၣ်, တၢ်ဒိၣ်ထီၣ်ထီထီၣ်, မ့ၢ်ပတၢ်ဆၢမုၢ်လၢ်, ပတၢ်ဆၢထံၣ်ဘၣ်လၢပတၢ်ဖံးတၢ်မၤအပူၤ, လၢတၢ်ထုကဖၣ်မ့ၢ်တၢ်အရ့ဒိၣ်နီၢ်မးန့ၣလီၤ.